كل سنة وكل الناس طيبه طبعا رمضان على الابواب وكلنا بنستعد له بس للأسف معدناش بنحس برمضان زي زمان اكيد رمضان هو هو ماتغيرش احنا اللي بنتغير
انا عندي سؤالين وياليت كل اللي يقرأ البوست دا يجاوب عليه
(ملحوظة / الاجابه اجباريه وليست أختياريه) ماشي
السؤال الاول / ياترى لسه بتحس (بتحسي) برمضان زي زمان ؟
السؤال الثاني / بنقضي يومنا إزاي في رمضان ؟
وأنا هابدأ واجاوب على السؤالين
بالنسبة للسؤال الأول ... الاجابه ( لا ) معدش بحس برمضان زي زمان
السؤال الثاني ... اممممم هابدأ من السحور بتسحر على الساعه 4 كده وبعدين بخرج أصلي الفجر في المسجد وبعد كده أرجع انام لغايه ميعاد الكليه اروح الكليه وارجع لو رجعت بدري بنام شويه قبل الفطار واصحى قبل المغرب بنص ساعه كده اقرأ قرأن شويه واقف في البلكونه شويه اتفرج على الناس وهي مروحين يفطروا وبعدين المغرب يأذن وبعد الفطار هاتفرج شويه على التليفزيون واقعد اذاكر شويه واقوم اتنطط شويه وارجع اذاكر شويه وشويه تليفزيون ممكن أنام للسحور وممكن افضل صاحيه دا لو كنت راجعه بدري
لو روحت من الكليه بقى متأخر قبل الفطار علطول او بعد الفطار حتى بفطر وبعد كده ادخل أنام مهدودة طبعا واصحى اذاكر شويه اتنطط برده شويه ممكن أنام قبل السحور وممكن لا
متعة رمضان عندي بتبدأ في أخر 10 أيام بروح أصلي التهجد في المسجد بستنى انا العشر ايام دول كل رمضان بفارغ الصبر مع انها بتبقى ايام متعبة اوي ممكن اليوم مش بيصفى غيرعلى 3او 4 ساعان نوم بس مش بيبقى مهم المهم صلاة التهجد في المسجد بتبقى دي مقمة المتعة بجد
ربنا يعيني بقى رمضان دا وان شاء الله هاروح اصلي التراويح في المسجد
هو رمضان معدش زي زمان ... زمان كان فيه لمة لمة العيلة مع جدي ونينتي على الفطار كانوا هما فرحة رمضان دلوقتي رمضان
وحش اوي اوي من غيرهم يلا بقى ربنا يرحمهم ويرحم أيامهم
***
انا خلصت
والاجابه اجباريه
