جالي تاج

جالي التاج الجميل دا من
الأخ العزيز أبو صلاح
والجميلة زيزي
ومش عاوزة أقول إن مفيش حد بعتلي معاه صنينة كنافة ولا حتى كوبية مايه ابلعه بيها بس يلا
ما علينا

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم ؟ واشمعنى
طبعا كل عصر فيه مميزاته وعيوبه بس انا اصلا مكنتش بحب مادة التاريخ فانا مش عارفه بالظبط ... بس اختار العصر اللي الرسول ( صلى الله عليه وسلم ) عايش فيه
اشمعنى دي بقى
مش محتاجة لكلام كتير كفاية انك تكون عايش في مكان وزمان الرسول موجود فيهم ولأني مش هاعرف ألم بكل حاجة حلوة كانت موجودة ايام الرسول فأنا هاسكت وهأسيب الإجابة مفتوحة


اول اولويه فى حياتك عيلتك ولا شغلك ولا اصحابك؟
عيلتي طبعا اولا وقبل كل شئ وبعد كده أصحابي وبعدين شغلي

ايه اكتر حاجه بتحبها فى رمضان؟

أخر عشر أيام في رمضان بيبقى فيهم صلاة التهجد وليلة القدر برده ربنا يبلغنا
وحاجة كمان
المحاضرات وقتها بيتخسف بيه الأرض المحاضرة اللي مدتها ساعة بتبقى 35 دقيقة واليوم اللي بخلصه الساعه 6 بخلصه الساعة 3


اوصف ليا اجمل فطار ممكن تفطره
أجمل فطار دا كان زمان ... أيام ما كان جدي وجدتي عايشين كنا بنطلع نفطر معاهم كل يوم كانت لمتنا على الفطار دي أجمل حاجة في رمضان

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
أكيد طبعا هأحاول أكون عادل
أعمل إيه عشان أتاكد اني حاكم عادل ... هاعمل زي سيدنا عمر بن الخطاب كنت هانزل بنفسي متخفيه واشوف أحوال الرعية وكنت هتواصل برده مع الرعية وأشوف
وطبعا قبل ما هأعمل أي حاجة هاستخير ربنا الأول

اللى بيبوظ الحكام ؟ نفسهم ؟ ولا الشعب ؟ ولا الحاشية المقربة؟
في أعتقادي التلاته
نفسهم وبعدين الحاشية المقربة وبعد كده الشعب


مين أكتر اعلامي مصري بتحترمه؟
عمرو خالد
والشيخ محمود المصري ( أبو عمار



قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟
لا والله ماقرأتوش

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
كنت أتمنى اكون دكتورة ... ودكتورة نساء ولاده


ايه تانى بلد تتمنى تعيش فيها بعد مصر؟
أمريكا ... ومحدش يسأل ليه ؟؟؟

اوصف ليا ترتيبات اجمل فرح ممكن تحضره
أهم حاجة طبعا أن الطرفين يكونوا بيحبوا بعض وتكون الناس فرحانين من قلبهم والترتيبات دي بتختلف حسب الأمكانيات بس اهم حاجة انهم يكونوا بيحبوا بعض

بتراعي كلام الناس والقيل والقال؟ لو اه او لو لا قول لى ليه؟
قبل كده ماكنش بيهمني كلام حد كنت بعمل اللي انا عاوزاها ولا يهمني عارفه ان كل واحد ليه دماغه وممكن حاجات كتير انا اعملها مش تعجب ناس معينة فكنت بعمل اللي انا عاوزاه وماليش دعوه بحد
بعد كده بقيت بعمل حساب لكلام الناس بس مش في كله يعني ماهما مش هيمشوني على مزاجهم
ليه بقى بقيت بعمل حساب لكلامهم معرفش انا لقيت اني اعمل حساب لكلامهم أسلم

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
لا طبعا ... ممكن استغنى عن الموبايل والكاميرا الديجتال لكن الكمبيوتر والنت لا طبعا
انا بقعد اعيط لما النت بيفصل واقعد اتنطط لغاية مايجي


السعاده هى؟
طبعا في رضا ربنا والستر والصحه وراحة البال


عندك أمل ؟؟ أسبابك ؟
لازم يكون عندي حتى لو ماعنديش هاتلكك بأي حاجة
عشان أقدر أعيش بكرة


لما تحب تهرب من كل شئ بتروح فين؟
بروح أوضتي أنام


امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
من كام شهر كده جيت أحسبها اتلقيت اني قريب هأكمل عشرين سنه


لما بتعمل عمل خيرى بيكون ايه هو دافعك الاول؟
طبعا رضا ربنا وأني اكون فرجت كربة واحد مسلم

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لا مش بشرب سجاير مع أني نفسي أجربها عشان اعرف احساس الناس اللي بيشربوها واعرف ليه هما متمسكين بها كده اوي
ولو شفت واحده ست بتدخن طبعا حتضايق منها
ليه لاننا مجتمع شرقي وعاداتنا وتقالدينا مش بتقول كده


بتعرف ايدك اليمين من الشمال ازاي؟
اعمل نفسي إني بسلم على حد وطبعا انا بسلم باليمين


ايه اكتر اله موسيقيه بتحبها ؟
البيانو

فى رأيك ليه الذوق والنخوه اتعدموا؟
لا ما اتعدموش ممكن يكونوا قلوا لكن اتعدموا لا


ايه الحاجه اللى لو حصلتلك تبقى سعيد قوى؟؟؟
برده رضا ربنا والستر والصحة وراحة البال بس هاكون سعيدة اوي لو حاجة كده حصلت بس الحاجة دي للأسف عاوزة معجزة عشان تحصل وبما إن عصر المعجزات انتهى فطبعا مش هتحصل
بضحك على نفسي عارفه


تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
ارض زراعية

البحر و لا النيل؟؟؟
البحر ... مع إني بخافه اوي

مركب و لا طياره؟؟
والله ماجربتش الطيارة بس ممكن يكون المركب عشان انا بحب البحر ممكن

مجنون و لا عاقل؟؟
أنا الناس حواليا بيقولوا عليا عاقلة مع اني كتير بحس نفسي مجنونة


تقرأ كتاب و لا تتفرج عليه فيلم؟
اقرأ كتاب لأنه بيوسع خيالي اكتر


بتمرر التاج لمين؟؟؟
اه جينا للمهم
بمرره ل ....
بتاع العسل
سي السيد
حدوته
حازم شلبي
اوشة
تمر حنه
ريل لف
عاليا الحليم
حصان بري
عاشقة الوطن

وأي حد عاوزه والله يتفضل يأخده

المسابقة الرمضانية

السؤال الثالث عشر
تحدثت سورة الرعد عن مظاهر كثيرة للقدرة الإلهية المطلقة ... اذكر ثلاثة منها مع ذكر الآيات التي دلت عليها

السؤال الرابع عشر
سميت سورة النحل بسورة النعم لما تضمنته من مظاهر كثيرة وألوان عديدة لنعم الله على عباده ... اذكر عشرا من هذه النعم كما وردت في السورة مع بيان الآيات التي تضمنتها

السؤال الخامس عشر
تحدثت سورة الإسراء كثيرا عن القرآن ووصفته بأوصاف كثيرة وبينت دوره ووصفت حال من يتعامل معه تعاملا صحيحا ... اذكر آية من آيات سورة الإسراء تحدثت عن دور القرآن في الهداية واذكر كذلك الآيات التي بينت فعل القرآن وأثره فيمن يتعامل معه تعاملا صحيحا

المسابقة الرمضانية

نظرا للمجهود الفظيع اللي انا عملته في العزومة مقدرتش انزل مسابقة امبارح ولسبب كمان عشان العزومة تأخد حقها وبما إن انهارده خلاص خلص هانزل مسابقة امبارح ومسابقة انهارده وبكرة كمان دلوقتي

السؤال العاشر
"الناصر هو الله " حقيقة ينبغي على كل مسلم أن يعتقدها ويؤقن بها ، ولقد ظهر الكثير من آثار هذه الحقيقة في سورة التوبة... أذكر آيتين تؤكدان عليها من السورة

السؤال الحادي عشر
اذكر من خلال قراءتك وتدبرك للجزء الحادي عشر ثلاث آيات تدل على أن الله عز وجل قريب من عباده ينصرهم ويسمعهم ويستجيب دعائهم

السؤال الثاني عشر
جاء في ختام سورة هود ( وكلا نقص عليك من أنباء الرسل ما نثبت به فؤادك وجاءك في هذه الحق وموعظة وذكرى للمؤمنين ) هود 120
ما هي التذكرة والموعظة التي حملتها سورة هود للرسول عليه الصلاة والسلام ولأمته من بعده؟

عزومة

كل سنة وانتوا طيبين
ورمضان كريم
عزومه على افطار جماعي بس على اد ما قسم
ملحوظة ما حدش يسألنى عن الاكل دا يبيقى ايه
واتفضلوا بالهنا والشفاء

اتفضلوا العصير

اتفضلوا الحلو

العزومة دي عملاها على شرف الناس الدمياطية

المسابقة الرمضانية

السؤال التاسع

يظن البعض أن صلاحه في نفسه فقط كاف لنيل رضا الله عز وجل ، فيترك دعوة غيره من الشاردين ولا يفكر إلا في نفسه ، ولقد بين القرآن خطأ هذا الفهم وذلك في عرضه لقصة أصحاب السبت في سورة الأعراف ... أذكر ما يؤكد هذا المعنى من الآيات

المسابقة الرمضانية

في الأول انا ليا طلب لاي حد يقرأ البوست دا
ياإما يدعي على سامح ربنا يهده او يدعيله ربنا يهديه
سامح دا بتاع النت
اللي كل شويه يفصل النت بالأيام
المهم
المسابقة ليوم6 و7 و8

المسابقة السادسة
اذكر من الجزء السادس إية تبين وظيفة القرآن كرسالة هادية ومعجزة تغييرية
السؤال سهل وبسيط خالص

المسابقة السابعة
في الجزء السابع : ذكر القرأن نموذجا لأناس سمعوا آيات القرآن وفهموها وتأثروا بها، وقالوا من الكلمات ما يدل على دخول نور الإيمان إلى قلوبهم ... اذكر هذه الآيات التي تدل على هذا النموذج في الجزء السابع
مفيش أسهل من كده بقى

المسابقة الثامنة
لماذا يقرأ الإنسان؟! وهل يعقل أن يقوم المرء بالقراءة بلسانه وحنجرته دون أن يعمل عقله فيما يقرأ ، ودوم أن يجتهد في فهم المعنى المراد من الكلمات التي تقع عليها عيناه ؟! وكم كتابا يقرأه الناس دون فهم معانيه ؟
السؤال دا بقى مش عاوز مذاكرة

أعترافات

من أول يوم دخلت فيه عالم التدوين وعرفت طريق المدونات اتلقيتها فرصة كويسة إني الاقي نفسي فيها بس مكنتش اعرف ان ممكن في اي لحظة حزن او غضب انسحب وارجع تاني اكتم في نفسي فكرت اني اكتب وأقول كل اللي في قلبي بس للأسف انا معرفش اتكلم او حتى احكي عن اللي يضايقني غير لما الموضوع او الازمة دي تعدي
بجد كانت حالة أكتئاب صعبة ... فكرت أن أقفل المدونه واسيب عالم التدوين اتلقيتها كلها محصلة بعضها ومش فارقه معايا في حاجة
وهنا عاوزة اشكر (أبو صلاح ) صاحب مدونة تنفيس هو أي نعم معملش حاجة بس كفاية انه السبب أني انسى فكرة قفل المدونه وعرض علي المساعدة ... انا بشكره جدااا
( ولما ضاقت حلقاتها وأستحكمت فرجت وكنت أظنها لن تفرج ) الحمد لله
بس انا بقى عاوزة اعرف
ليه الطيب في الزمن دا بقى اهبل ؟ وليه نتيجة الخير اللي بنعمله شر وحقد وكراهية ؟ ليه الأخ بيبيع أخوه ليه اللحم بقى بيتباع والدم بقى مايه
طيب بلاش الاسئلة دي
إيه يكون شعورك لما تجري تستنجد بناس من لحمك ودمك ومش تلاقي منهم غير كل نظرات الفرح والشماته

المسابقة الرمضانية

السؤال الخامس

من الحقائق التي تؤكد عليها سورة النساء أن الله عز وجل لا يظلم الناس شيئا وأن أي نقص يحدث لهم هو بسبب أفعالهم ... أذكر ثلاث آيات من السورة تؤكد هذا المعنى